( मालेगाव) मालेगाव येथील जे ए टी महिला महाविद्यालयात सावित्रीबाई फुले पुणे विद्यापीठ विद्यार्थी कल्याण मंडळ, जे ए टी महिला महाविद्यालयातील विद्यार्थी विकास मंडळ आणि इंग्रजी विभाग यांच्या संयुक्त विद्यमाने एक दिवसीय निर्भय कन्या अभियान कार्यशाळेचे आयोजन करण्यात आले होते. आजच्या बदलत्या सामाजिक परिस्थितीत मुलींनी निर्भयपणे वागणे अत्यंत आवश्यक आहे. छेडछाडीच्या घटनांना न घाबरता जशास तसे प्रत्युत्तर देणे, निडरपणे कठीण प्रसंगी सामोरे जाणे यासाठी विद्यार्थिनींना मार्गदर्शन करण्यासाठी सदर कार्यशाळेचे आयोजन करण्यात आले होते. सदर कार्यशाळेचे उद्घाटन महाविद्यालयाच्या प्राचार्या डॉ. सलमा अब्दुल सत्तार यांच्या शुभहस्ते झाले. कार्यशाळेचे प्रास्ताविक विद्यार्थी कल्याण अधिकारी डॉ. फर्जना यांनी केले. इंग्रजी विभाग प्रमुख प्रा .मेश्रामकर सुनेत्रा यांनी उपस्थित मान्यवरांचा परिचय करून दिला आणि सत्कार केला. सदर कार्यशाळेत प्रथम सत्रात महाविद्यालयाच्या प्राचार्या डॉ. सलमा अब्दुल सत्तार, द्वितीय सत्रात एडवोकेट गीतांजली बाफना, आणि तृतीय सत्रात ज्युडो कराटे आणि मार्शल आर्ट प्रशिक्षक मुदस्सीर हुसेन यांनी मार्गदर्शन केले. कार्यशाळेच्या प्रथम सत्रात डॉ. सलमा अब्दुल सत्तार यांनी *निर्भय कन्या अभियान* या विषयावर प्रथम पुष्प गुंफले. समाज विकासासाठी महिलांनी अन्यायाविरुद्ध निर्भयपणे उभे राहणे गरजेचे असल्याचे प्रतिपादन त्यांनी केले. विद्यार्थिनींनी आत्मनिर्भर व्हावे आणि संरक्षणाचे धडे घ्यावे असे आवाहन त्यांनी केले. कार्यशाळेच्या द्वितीय सत्रात मालेगावातील नामवंत वकील एडवोकेट गीतांजली बाफना यांनी *महिला अत्याचार आणि कायदे* या विषयावर मार्गदर्शन केले. त्यांनी विद्यार्थिनींना समाजातील विघातक वृत्तींच्याद्वारे होणारी अनुचित शेरेबाजी, अनुचित मागणी, अनुचित वर्तन इत्यादीचा प्रतिकार कशाप्रकारे करावा त्याचप्रमाणे महिला अत्याचारा विरोधात आवाज उठविण्यासाठी असलेले कायदे याबाबत मार्गदर्शन केले. कोणाही व्यक्तीकडून काही त्रास होत असल्यास त्वरित महाविद्यालयात उपलब्ध असलेल्या हेल्पलाइन नंबर वर संपर्क साधावा असे आवाहन केले. कार्यशाळेच्या तृतीय सत्रात
*निर्भय कन्या जागरूकता अभियान- काळाची गरज* या विषयावर मार्शल आर्ट प्रशिक्षक, मुदसिर हुसेन मोहम्मद साबीर यांनी आपले विचार मांडले. अंतिम सत्रात मुदसिर हुसेन आणि त्यांच्या टीमने आपल्या प्रात्यक्षिकांसह महाविद्यालयीन तरुणींना स्वसंरक्षणाचे धडे दिले. यामध्ये विद्यार्थिनींनी जुडो कराटे, तायक्वांदो, सिकाई मार्शल आर्ट, इत्यादींची प्रात्यक्षिके दाखविली तसेच विद्यार्थिनींनी जवळ असलेल्या वस्तूंचा उपयोग करून समाजकंटकांपासून स्वतःचे संरक्षण कसे करावे याबाबत उपयुक्त माहिती दिली आणि मार्गदर्शन केले. प्रात्यक्षिकाद्वारे विद्यार्थिनींना स्वसंरक्षणाबाबत महत्त्वाच्या संरक्षणाबाबत टिप्स दिल्या सदर कार्यशाळेत विद्यार्थ्यांनीही उत्स्फूर्तपणे सहभाग नोंदविला. प्रा. मेश्रामकर सुनेत्रा यांनी आभार मानल्यावर कार्यशाळेची सांगता झाली. कार्यक्रमाचे सूत्रसंचालन डॉ फरजाना यांनी केले . कार्यशाळेच्या यशस्वीतेसाठी कु नौशाबा , कु. मिसबाह, कु. जुवेरिया, कु. आफिया इत्यादींनी परिश्रम घेतले.