नाशकात खळबळ : दिराने भावजयी वर तब्बल तीस वेळा चाकूने वार करत केला खून

नाशिक ब्यूरो टिम(मालेगाव लाईव्ह न्युज नेटवर्क):

:नाशिकमधील गंगापूर रोडवरील संत कबीरनगर येथे दिराने भावजयीचा धारदार शस्त्राने वार करीत खून केल्याचा प्रकार उजेडात आला आहे. संशयिताचा हा तिसरा खून आहे. काही दिवसांपूर्वी तुरुंगातून बाहेर आल्यानंतर रात्री खून केल्याचे उघडकीस आले.

संशयित आरोपी अट्टल गुन्हेगार

संतोष आंबेकर हा संशयित फरारी असून, पोलिस त्याचा शोध घेत आहेत. संतोष आंबेकर हा सराईत गुन्हेगार असून, त्याच्यावर यापूर्वी हत्या आणि इतर गुन्हे दाखल आहेत. मध्यवर्ती कारागृहात असलेला संतोष काही महिन्यांपूर्वी जामिनावर बाहेर पडला. मृत महिला संशयिताची भावजय असून, त्यांच्यात अनैतिक संबंधाचे कारण असल्याचे पोलिसांच्या प्राथमिक चौकशीत समोर येत असल्याचे सांगण्यात आले, तसेच सोशल मीडियावरील मृत महिलेच्या काही पोस्टची माहिती पोलिस घेत आहेत. पूजा आंबेकर (वय २७) असे खून झालेल्या महिलेचे नाव आहे. बुधवारी (ता. ३) रात्री ही घटना घडली.

या प्रकरणी गंगापूर पोलिस ठाण्याचे वरिष्ठ निरीक्षक रियाज शेख यांनी सांगितले, की संतोष आंबेकर आणि संदीप आंबेकर हे भाऊ असून, मृत पूजा आणि संदीप यांचा विवाह झाला होता. मात्र, काही कारणांमुळे संदीप आणि पूजाचे पटत नव्हते. यामुळे पूजा संतोषकडे राहत होती. त्यातूनच त्यांच्यात अनैतिक संबंध प्रस्थापित झाले होते. मात्र, या दोघांमध्ये आर्थिक कारणातून सातत्याने वाद होत. विशेषतः संशयिताने आई व बहिणीला पैसे दिल्यावरून वाद होत. बुधवारी रात्रीही असेच झाले. किरकोळ वादानंतर संतप्त झालेल्या संशयिताने पूजावर धारदार शस्त्राने वार केले. संशयिताने पूजाच्या शरीरावर तब्बल तीस वेळा वार केले. यानंतर संशयित फरारी झाल्याचे निरीक्षक शेख यांनी सांगितले.

महिला जागेवरच गतप्राण झाली.

हत्येचा गुन्हा दाखल

 वरिष्ठ पोलिस अधिकाऱ्यासह गुन्हे शोधपथकाने घटनास्थळी धाव घेतली. या प्रकरणी गंगापूर पोलिस ठाण्यात हत्येचा गुन्हा दाखल झाला. फरारी संशयित सराईत आहे. त्याच्यावर यापूर्वीही खुनाचे गुन्हे आहेत. तुरुंगामधून सुटल्यानंतर त्याने पुन्हा खूनच केला. लवकरच त्याच्या मुसक्या आवळल्या जातील, असे शेख यांनी सांगितले.